Në Qarkun e Korçës, ka fshatra e zona ku paisja me çertifikata pronësie të tokës mbetet një problem I pazgjidhur prej 28 vitesh. Nisur nga orientimi I qeverisë që Toka bujqësore mbetet prioritet, Prefekti I Qarkut Korçë, z. Dhori Spirollari zhvilloi të premten një takim institucional për problematikat dhe zgjidhjet në çështjet e pronësisë së tokës. ‘Ndeshemi me dhjetra kërkesa për problemet e tokës, prandaj duhet koordinimi institucional I punës për t’ u dhënë zgjidhje deri në dhjetor’ u shpreh Prefekti Spirollari. Ai kërkoi angazhim nga bashkitë, zyrat e hipotekave dhe ALUIZNI, përfaqsues të të cilëve u thirën dhe morën pjesë në këtë takim. Në disa rrethe të rajonit të Korçës, midis fshatrave apo edhe brenda banorëve të një fshati, trashëgohen konflikte të vjetra pronësie që pengojnë dhënien e çertifikatave e si rrjedhim shfrytëzimin normal të tokës bujqësore.
