Në fjalën e tij në 30-vjetorin e krijimit të RENEA-s, ministri i Brendshëm, Bledi Çuçi, ndërsa vlerësoi punën e kësaj njësie, bëri një bilanc të shkurtër të punës në këto vite.
Çuçi u shpreh se janë kryer 2827 operacion me rrezikshme të lartë, mesatarisht 94 të tilla në vit ose 1 në çdo katër ditë.
Me buxhetin e vitit 2022, ai shtoi se janë parashikuar investime për RENEA-n, ndërsa siguroi oficerët e kësaj njësie se do të kenë mbështetjen e qeverisë.
“Sot, kjo njësi është elita e trupës së policisë dhe ky titull nuk i është dhënë as përmes një procedure të mistershme dhe as përmes një akti burokratik, por e ka fituar përmes sakrificave duke mos bërë kompromis me krimin. Rruga nuk ka qenë e lehtë, që nga krijimi i saj kjo njësi ka organizuar 2827 operacion me rrezikshme të lartë, 94 në vit apo 1 operacion në 4 ditë. Detyra e kësaj elitë kap një fushë të gjera që nis nga çlirimi i pengjeve, deri tek kapja e grupeve kriminale”, tha ndër të tjera Çuçi.
Ai kujtoi edhe ata që kanë humbur jetën në krye të detyrës.
“Nga RENA kanë humbur jetën 5 djem të shkëlqyer. Emrat janë në murin e kujtesës. I fundit është ai i Ibrahim Bashës që humbi jetën në Lazarat në përballje me trafikantët.”
