Me certifikimin e rezultatit të dalë nga vota e 25 Prillit javën e ardhshme, ndër të parat procese që do t’i nënshtrohet verifikimit nga Komisioni Qendror i Zgjedhjeve është përdorimi i teknologjisë në të gjithë vendin.
Si pikë kryesore vlerësimi do të ketë funksionimin e pajisjeve të identifikimit elektronik, pasi nga ankimimet në KAS, doli se pika e vetme ku përdorimi i teknologjisë regjistroi një problematikë, jo të qenësishme në procesin zgjedhor, ishin lënia e shenjës së gishtit nga i njëjti individ më shumë se një herë.
ILIRJAN CELIBASHI
KOMISIONERI SHTETEROR I ZGJEDHJEVE
“Duket që ka qenë një sjellje e operatorit dhe duket që trajnimi nuk ka funksionuar në këtë rast për të lehtësuar procesin e votimit sepse nuk jemi para rastit e votimit të disafishtë sepse e para ka ndodhur fenomeni brenda një qendre votimi dhe ka pak gjasa të mendohet që një njeri ka ardhur 20 herë, i njëjti person ka ardhur për llogari të 19 votuesve të tjerë, është evidente kjo dhe të paktën në dy raste duket që numri i letërnjoftimit që i korrespondon leximit të 10 apo 15 gishtërinjve të njëjta i përket numrit të letërnjoftimit të operatorit.”
Për të parën herë, KQZ, do të flasë me prova nëse shkak i mbi 80 mijë fletëve të pavlefshme të votimit, që dogjën me e pakta pesë mandate, u bë identifikimi i kandidatit për deputet me numër.
ILIRJAN CELIBASHI
KOMISIONERI SHTETEROR I ZGJEDHJEVE
“Personalisht vazhdoj t’i qëndrojë asaj pikëpamje se nëse do të ishte me emra, ndoshta nuk do të ishte një numër kaq i madh i fletëve të votimit të pavlefshme. Por tashmë jemi para faktit që kemi 80 mijë e disa fletë votimit të pavlefshme. Për çfarë ka ndodhur kjo, sepse ishte koha e pamjaftueshme, fleta e votimit ishte e komplikuar, duke i vlerësuar ndoshta do të kuptojmë se ku ka qenë problemi. Kjo do të na ndihmojë për të ardhmen, jo vetëm për KQZ pro edhe për ligjvënësin, për të kuptuar se çfarë ka shkruar keq me qëllim për ta rregulluar në zgjedhjet e ardhshme.”
Për një nga pikat e kritikuara në raportet e kaluara të OSBE-ODIHR, për financimet dhe shpenzimet e partive politike, përpunimi i të dhënave është ende në fillesat e tij.
ILIRJAN CELIBASHI
KOMISIONERI SHTETEROR I ZGJEDHJEVE
“E vërteta është së është bërë progres, jo vetëm në pikëpamje të ligjit por edhe në mënyrën si vetë partitë politike e kanë qasur. Mendoj që ka një transparencë disi më të madhe, por mbetet akoma shumë për të bërë dhe është koha që të kemi një qasje më të plotë dhe serioze në lidhje me këtë aspekt jo vetëm me procesin zgjedhor, por në përgjithësi me sjelljen politike të partive.”
CELIBASHI: VERIFIKIM TEKNOLOGJISE
“FLETET E PAVLEFSHME TE VOTIMIT DO KALOJNE NE SKANER”
