Byreçka me mish të grirë në tigan nga shefja e kuzhinës Albana Mançja

Byreçka të shijshme dhe të buta, të mbushura me mish të grirë dhe perime, që përgatiten lehtësisht në tigan. Më poshtë gjeni recetën nga shefja e kuzhinës Albana Mançja, me një mbushje plot shije dhe aromë.

Përbërësit:

– 300 g miell

– 150 ml ujë të vakët

– 1 lugë çaji maja të thatë aktive

– ½ lugë çaji sheqer

– 1 lugë gjelle vaj

Për mbushjen:

– 250 g mish i grirë

– ½ qepë e vogël ose presh

– 1 karotë e vogël

– 1–2 lugë gjelle salcë soje

– 1 lugë çaji salcë pikante

– 1 lugë çaji xhenxhefil

– Kripë

– Piper

Përgatitja:

Përziejmë majanë, sheqerin dhe ujin e vakët dhe e lëmë për 5–10 minuta. Më pas shtojmë miellin dhe vajin dhe formojmë një brumë të butë, të cilin e lëmë të pushojë për rreth 1 orë, derisa të fryhet.

Ndërkohë, përgatisim mbushjen. Në një tigan me pak vaj kaurdisim qepën ose preshin dhe xhenxhefilin. Shtojmë mishin e grirë dhe e skuqim derisa të marrë ngjyrë. Hedhim salcën e sojës, salcën pikante, nëse dëshirojmë, dhe karotën. E lëmë të lidhen shijet për 5 minuta.

Ndajmë brumin në 8 kuleçë, hapim secilin me dorë dhe vendosim nga një lugë mbushje në mes. Më pas i mbyllim mirë. I vendosim byreçkat në tavë me letër pjekjeje dhe i lëmë për 20 minuta që të bëhen të buta dhe të fryra. Më pas i vendosim të piqen në furrë të parangrohur ose i skuqim në tigan me pak ujë.