Gjergj Buxhuku nga Konfindustria, teksa fliste për ngritjen e Bordit të Transparencës, në një lidhje direke në edicionin e lajmeve në “Vizion Plus”, u shpreh se një ndërhyrje qeveritare ështe e nevojshme. Megjithatë, ai shpreh rezerva për metodikën.

 

“Problemi është mënyra se si është bërë dhe metodika nga të cilat ndiqen për t’u fiksuar këto çmime. Të gjitha shtetet e rajonit i kanë çmimet e karburanteve mjaft më të ulëta sesa tonat. Kjo do të përkthehet në kosto më të lartë, ulje të konkurrencës sonë, fuqizim të konkurrencës së vendeve konkurrente tona në tregti, importet do të mbysin prodhimin vendor dhe do të kemi shtim të papunësisë dhe falimentin të biznesve dhe të gjitha pasojat që janë të lidhura me njëra-tjetrën.”

 

Sa i përket legalizimit të kanabisit për qëllime mjekësore, Buxhuku u shpreh se për të ndërmarrë një nismë të tillë, duhet marrë leja nga partnerët ndërkombëtarë. Nëse leja merret, shtoi ai, mund të bëhet më pas një studim për të kuptuar sesa përfitime dhe humbje do të ketë Shqipëria.

 

“Nuk jemi të qartë nëse e ka marrë lejen Shqipëria për të kultivuar kanabisin nga BE dhe aleatët tanë strategjik. Shqipëria është në një proces integrimi, ka detyrime ndaj partnerëve ndërkombëtarë. Shqipëria ka marrë notë të zezë në të gjitha vlerësimet që ka bërë në procesin e integrimit kur vjen fjala të narkotikët dhe kanabisi. Nëse Kryeministri vendos të ndërmarrë këtë hap, pa miratimin e vendeve euroatlantike, unë mendoj që Shqiperia do të marrë një notë shumë negative për procesin e integrimit në BE. Nëse do të vazhdohet me politikën e lejimit të kanabisit mjekësor, këtu duhet patur parasysh mirë se si do ta mendojë qeveria. Cilat do të jenë përfitimet dhe humbjet. Mundet që në kushtet e një shteti të dobët, varfërie masive, mundet të kthehet në një epidemi që mund të godasë ashpër sektorë të rëndësishëm, siç është bujqësia.”

Leave a Reply

Your email address will not be published.