Kampionati Botëror i Futbollit ka ndryshuar rrënjësisht atmosferën e Moskës, e cila disa muaj më parë shihej me një sy kritik për shkak të përfshirjes së saj në zgjedhjet presidenciale amerikane, apo helmimit të ish agjentit rus Sergei Skripal në Mbretërinë e Bashkuar.
Zëri i Amerikës, në një reportazh të tijin, vëren se tifozë nga e gjithë bota vazhdojnë të mbërrijnë në rusi në kulmin e aktiviteteve që shoqërojnë kampionatin e futbollit, duke e kthyer Moskën në një mozaik botëror festimesh.
Rrugët rreth Kremlinit, nën masa të rrepta sigurie, janë transformuar në skena të shfaqjes së pasionit latin dhe ritmit afrikan, por ka edhe mijëra turistë që shkelin në tokën ruse për herë të parë, si tifozë nga Amerika e Jugut, Afrika dhe Azia.
Tifozët kanë përshtypje të ndryshme.
“Gjithçka është e re për ne, kulturë e re, gjuhë e re dhe është shumë e vështirë të komunikosh. Por ne jemi shumë të ngazëllyer”, thotë një tifoze e Kolumbisë.
“Njerëzit janë shumë të mirë dhe gjithçka duket shumë bukur”, thotë Salah tifoz i Egjiptit.
Por, edhe vendasit po shohin për herë të parë një atmosferë të jashtëzakonshme.
“Të gjithë janë shumë miqësorë me njëri-tjetrin. Kjo është një atmosferë feste, një ngjarje e jashtëzakonshme, më e bukur se festimet për Vitin e Ri!, thotë Natalya tifoze e Rusisë.
Turistët dhe tifozët ndërkohë eksplorojnë qytetin, të tërhequr nga atraksionet kulturore, prej galerive të artit të Shën Petërburgut, e deri tek trashëgimia islame më pak e ekspozuar, në qytetin pritës të Kazan-it.
