Këto janë ditët më të vështira për krerët e shteteve në të gjithë botën pasi përballja me pandeminë Covid 19 ka detyruar marrjen e masave të forta. Spanja është paralizuar tërësisht deri më 9 prill, numri i viktimave i ka kaluar 6 mijë e 500 ndërsa rreth 80 mijë të tjerë janë të infektuar. Kryeministri Pedro Sanchez kritikoi BE duke thënë se kriza shëndetësore e ka vendosur në momentin më kritik në histori.
Rastet janë shtuar ndjeshëm edhe në Gjermani ku numërohen rreth 60 mijë të prekur ndërsa nurmi i viktimave ka shkuar në 455. Disa pacientë nga Italia dhe Franca po trajtohen në spitalet gjermane pasi të dyja vendet po përballen me vështirësi të mëdha në sistemin shëndetësor. Në Francë më shumë se 2 mijë persona kanë humbur jetën dhe rreth 40 mijë të tjerë janë të infektuar.
Kryeministri britanik Boris Johnson paralajmëroi se gjërat do të përkeqësohen dhe se do të vendosen kufizime të mëtejshme për qytetarët. Në të gjithë vendin janë regjistruar më shumë se 1 mijë viktima dhe rastet e konfirmuara me Covid -19 i kaluan 17 mijë.
Ndërkohë edhe në SHBA, epiqëndra e re e sëmundjes, shifrat rriten ndjeshëm nga dita në ditë. Në të 50 shtetet janë konfirmuar persona të infektuar ndërsa numri i përgjithshëm i afrohet 124 mijë, më shumë se 2 mijë njerëz kanë humbur jetën. Një fëmijë më pak se një vjeç është viktima më e re nga koronavirusi në botë. Vogëlushi ishte nga Illinois.
Nju Yorku, shteti më i prekur është në karantinë totale dhe masat janë ashpërsuar në të gjithë vendin. Në rang botëror më shumë se 32 mijë persona kanë humbur jetën nga koronavirusi ndërsa rreth 700 mijë të tjerë janë infektuar.
