Ish-deputeti i Partisë Demokratike, Luçiano Boçi renditi disa mashtrime, që sipas tij, kryeministri Edi Rama ka thënë në tetë vite qeverisje për mësuesit. Boçi deklaroi në “Facebook” se Rama ka mashtruar vazhdimisht mësuesit për rritjen e pagës. Ai tha se pavarësisht deklaratave dhe premtimeve të shumta, nuk ka asgjë konkrete.
“Ka 8 vite që mashtruesi KM vërtitet në takime të stisura me mësuesit dhe përsërit të njëjtin refren: “Do të rrisim pagat për mësuesit”. Do t’i rrisim sot, do t’ii rrisim mot, do t’i rrisim mot mot. Dhe në fund asgjë! Mashtron e s’ka turp. Mashtron dhe krenohet që mashtron. Madje ajo që ka ndodhur këto vite është krejt e kundërta: U hoqi shpërblimin e festave të fundvitit dhe pagën e 13-të; Nuk ka indeksuar prej 8 vitesh inflacionin (6-9% i 2019 ishte hi syve dhe nuk mjafton as për indeksimin) dhe i ka detyruar të kryejnë shpenzime suplementare për kualifikimet, mësimin online e mjete mësimore; U ka ulur pagën reale, me shtimet e shpenzimeve për çmimet e rritura për energjinë, ujin dhe produktet bazike të shportës. Sot një mësues ble më pak produkte se në 2013.”
Boçin e akuzoi shefin e qeverisë se po mban drejtorët politikë të komanduar dhe tani do t’i fusë të gjithë nën pushtetin e tij dhe se për vite të tëra ka ushtruar presion tek mësuesit.
