Ish-deputeti PD, Luçiano Boçi u ka bërë thirrje maturantëve që t’i bashkohen protestës së opozitës këtë të hënë në orënb 18:30.
Në një postim në “Facebook”, Boçi duke u ndalur tek vendimi i fundit i qeverisë për rritjen e mesatares për maturantët që duhet të shkojnë në universitet, shprehet se kjo është një arsye akoma më e madhe se përse ata duhet t’i bashkohen opozitës.
Boçi më tej akuzon qeverinë se përmes këtyre vendimeve, që sipas tij janë abuzive, po stimulon largimin në masë të të rinjëve.
“Maturantë bashkohuni me qytetarët në protestë! Keni qindra arsye familjare e arsimore për të qenë sot pjesë e revoltës së shqiptarëve, në 18.30. Për kushtet mizerabël, për prindërit e papunë e të grabitur, për librat e deformuar, për programet e cunguara, cilësinë e mjerueshme. Jo vetëm kaq! I shtohet dhe mesatarja e rritur me përdhunë. Ju nuk mund të hidheni në rrugë të madhe se do Rama dhe Ministrja e tij rishtare. Shkatërruesit e Akademisë nuk mund të lejohen të shkatërrojnë të ardhmen e të rinjve. Nuk është hera e parë që Rama me Ministren e tij të Arsimit i ngulin thikë pas shpine maturantëve. Në të gjithë këto vite e ka bërë rregullisht me ndryshimin e rregullave të pranimit në Universitete. Po kështu me mesataren, me investimet e munguara, me bibliotekat që nuk ekzistojnë, me laboratorët e degraduara. Urrejtja e Ramës ndaj të rinjve nuk njeh limite. Tani që matura është pothuaj e përfunduar, është tradhëti t’i deklarosh maturantëve që pragu i hyrjes është rritur! Nota mesatare është objektiv që vendoset në fillim e jo tekë e Ramës. Kjo stimulon largimin masiv të tyre dhe lënien jashtë universiteteve. Alibia e imponimit të tyre me këtë masë drejt arsimit profesional është mashtrim dhe përcmim njëkohësisht i vetë Arsimit profesional. Vetëm PROTESTA i jep zgjidhje harbutërisë e tradhëtisë me të rinjtë. Ju presim në 18.30 para kryeministrisë!”
