Kryeministri Edi Rama zbuloi një diskutim me ministrin e Brendshëm, Bledi Çuçi kur në Kryesinë e PS diskutohej për listat përfundimtare të kandidatëve.
Gjatë një takimi online me skuadrën socialiste, kreu i qeverisë tha se Bledi Çuçi i ka kërkuar vetë që emri i tij të jetë në zonën e rrezikut.
“Bledi Çuçi, kapiteni i skuadrës tonë në Gjirokastër na ka mbajtur më shumë se 20 minuta në Kryesi duke këmbëngulur që të mos qëndronte tek objektivi bazë. E solla si një shembull të prekshëm të pasionit dhe të përkatësisë ndaj skuadrës. Si shembullin e dikujt që është në krye të një skuadre si ajo e Gjirokastrës dhe që mund të quhet që kërkoi të rrezikojë deri në fund duke kërkuar të vendoset i treti.”
Edi Rama falënderoi edhe Fatmir Xhafajn dhe Mimi Kodhelin që, po ashtu, kanë marrë përsipër një sfidë të tillë.
