Hamasi ka deklaruar se nuk do të marrë pjesë në raundin e ri të bisedimeve për armëpushim në Gaza, që pritet të rinisë këtë të enjte në Katar. Por, një zyrtar që po ndjek nga afër bisedimet tha se negociatorët do të konsultohen më pas me grupin palestinez.
Shtetet e Bashkuara presin që bisedimet indirekte të zhvillohen sipas planit, në Doha ndërsa kanë nënvizuar rëndësinë e përparimit të shpejtë të bisedimeve për të shmangur përhapjen e konfliktit në të gjithë Lindjen e Mesme.
Uashingtoni përfaqësohet në këto bisedime nga drejtori i CIA-s Bill Burns dhe i dërguari i SHBA-së për Lindjen e Mesme Brett McGurk.
Analistët e luftës kanë pritshmëri të ulëta për të arritur ndonjë rezultat konkret, me Izraelin që ka përforcuar pozicionin e tij gjatë javëve të fundit dhe Hamasin që tashmë drejtohet nga fraksioni i tij më i ashpër i cili nuk pritet të bëjë shumë lëshime.
Armëpushimi në Gaza është vendosur kusht nga Irani për të mos sulmuar Izraelin në shkallë të gjerë si hakmarrje për vrasjen e liderit të Hamasit në Teheran, Ismail Hanieh dhe një drejtuesi të lartë të Hezbollah në Beirut.
Zyrtarë iranianë kanë thënë se dështimi i bisedimeve për armëpushim ose zvarritja e tyre me qëllim, do të çonte në një sulm të drejtpërdrejtë dhe domethënës ndaj Izraelit nga Irani dhe aleatët e tij në rajon. /vizionplus.tv
