Prej më shumë se dy ditësh sistemi online i gjendjes civile po përballet me probleme që e bëjnë të mosfunksionojë. Situata është e njëjtë thuajse në të gjithë Qarkun Dibër.
Burime bëjnë me dije se aktualisht pa sistem janë zyrat e gjendjes civile në të gjitha njësitë administrative të Bashkisë së Matit, të Klosit, Bulqizës dhe Dibrës.
Sipas të njëjtave burimeve i njëjti problem aktualisht është edhe në kryeqytet ku qytetarët e kanë të pamundur të marrin shërbime në zyrat e gjendjes civile.
Ndërkohë, problemi i mosfunksionimit të këtij sistemi është në drejtorinë e përgjithshme të gjendjes civile, që është në varësi të Ministrisë së Brendshme.
Sakaq, mungesa e marrjes së shërbimeve pranë zyrave të gjendjes civile ka prekur të gjithë ata qytetarë që kanë nevojë të rinovojnë apo të aplikojnë për herë të parë për dokumentet biometrike. Gjithashtu, shqetësim mbetet edhe për emigrantët të cilët shfrytëzojnë kohën e pushimeve dimërore për të marrë pasaportat e reja apo për të regjistruar fëmijët që kanë lindur jashtë Shqipërisë.
Problemet me mosfunksionimin e sistemit të gjendjes civile janë të shpeshta. Kujtojmë se gjatë verës sistemi u bllokua prej më shumë se dy javësh duke bërë që qytetarët të mos merrnin dot shërbimet e nevojshme./vizionplus.tv
