Biden zyrtarizon rikandidimin për një mandat të dytë presidencial
Presidenti amerikan Joe Biden ka shpallur kandidaturën për t’u rizgjedhur president nga radhët e demokratëve, në zgjedhjet e ardhshme presidenciale që do të mbahen në vitin 2024.
Biden shpalli zyrtarisht kandidaturën e tij këtë të martë , duke nisur kështu betejën për të bindur votuesit se i meriton edhe katër vite të tjera në krye të Shtëpisë së Bardhë.
Në një video të publikuar , Biden e cilësoi garën e vitit që vjen si një luftë kundër ekstremizmit republikan duke argumentuar se i duhet më shumë kohë që të përmbushë zotimin e tij për t’i rikthyer vendit dinjitetin.
“Kur kandidova për president katër vite më parë, thashë se jemi në një betejë për shpirtin e Amerikës. Dhe vijojmë të jemi,” shprehet kreu i Shtëpisë së Bardhë në video-mesazh.
Slogani i Biden për zgjedhjet e 2024 do të jetë: “Let’s finish the job”, pra “Le të përfundojmë punën e nisur.”
Deri më tani, kandidaturën e kanë shpallur edhe ish-guvernatorja e Karolinës së Jugut Nikki Haley dhe ish-presidenti Donald Trump nga radhët e republikanëve.
