Beteja për qarkun e Dibrës/ PS e PD në garë me dy ish-kryebashkiakë
Partia Socialiste dhe Partia Demokratike kanë zgjedhur dy ish-kryetare bashkie si drejtues politikë për qarkun e Dibrës; Dionis Imeraj deri para pak javësh ishte në krye të kësaj bashkie, ndërsa demokrati Xhelal Mziu vjen në Dibër pas 3 mandatesh si kryebashkiak i Kamzës.
Imeraj ashtu si të gjithë drejtuesit socialist është renditur në një pozicion jo të sigurt, por në një intervistë për Vizion Plus ish-kryebashkiaku shpjegon se kjo lidhet me synimin e mazhorancës për 25 prillin, raporton Vizion Plus.
DIONIS IMERAJ
KANDIDAT, PS
“Një ekuacion strategjik i fushatës për të arritur objektivin tonë të 3 mandateve në qarkun e Dibrës. Dhe aspak nuk është as pjesë sakrifice, as pjesë imponimi, por është thjesht një luftë për të marrë mandatin e tretë.”
Përballë tij Xhelal Mziu është renditur i pari dhe synimi i tij është që të tregojë se në Dibër humbjet kanë qenë si pasojë e presioneve mbi zgjedhësit duke iu referuar dosjes së famshme “184”.
XHELAL MZIU
KANDIDAT, PD
“Jemi në një qark, i cili në këto 8 vite ka qenë një eksperiment se si mund të merren votat edhe pa dëshirën e votuesit. Por sot besoj se kanë ndryshuar shumë gjëra në raport me zgjedhjet e kaluara. Jemi absolutisht të bindur që do ta maksimalizojmë votën dhe që do të marrim 4 nga 5 mandatet që ka qarku i Dibrës.”
Të dy ekipet do të punojnë për të bindur qytetarët se cila është alternativë më e mirë; socialistët duke i meshuar investimet që janë realizuar në Dibër nga e majta; demokratët duke shfrytëzuar dështimet e PS, e cila prej vitit 2015 ka pasur edhe bashkinë.
Dionisi
“Kryesorja dhe kryefjala është rruga e arbrit, ku e premtuar nga PD për shumë e shumë vite ishte thjesht një anektodë dhe gënjeshtër për dibranët ku në fakt vetëm pas premtimit të kryeministrit Edi Rama është një realitet. Është një rrugë që është e prekshme”, u shpreh Imeraj.
“Nëse kërkon një zonë të varfër në Shqipëri është qarku i Dibrës. Që do të thotë se dora e shtetit ka qenë larg po themi këtij qarku, këtij rrethi dhe sot kudo që të shkosh nuk ke një rrugë të asfaltuar”, deklaroi Mziu.
Në vitin 2017 PS fitoi 2 mandate në Dibër, 2 Partia Demokratike dhe nga një LSI e PDIU; por këtë herë si pasojë e lëvizjeve të popullsisë, Dibra ka një mandat më pak.
