Ish-kryeministri italian, Silvio Berluskoni, ka fituar sërish vëmendje, pas deklaratave se ka rikthyer kontaktet me presidentin rus, Vladimir Putin.
Agjencia e lajmeve, LaPresse, ka publikuar një incizim të zërit – që duket se është bërë në mënyrë sekrete – derisa Berluskoni ka biseduar me pjesëtarë të partisë, Forza Italia.
Në atë incizim, Berluskoni ka thënë se Putin është në mesin e “pesë shokëve të vërtetë” të tij.
“Kam rikthyer kontaktet me presidentin Putin”, ka thënë ai, duke treguar si Putin ia ka dërguar “20 shishe me vodka dhe një letër shumë të ëmbël”, për ditëlindje.
Berluskoni ka thënë se ai i ka dërguar më pas Putinit shishe me verë italiane dhe një letër “po ashtu të ëmbël”.
Berluskoni ka mbushur 86 vjet më 29 shtator, pasi koalicioni i krahut të djathtë, ku përfshihet edhe partia e tij, Forza Italia, ka fituar zgjedhjet e përgjithshme.
Këto komente fillimisht janë hedhur poshtë si “rrëfime të vjetra” nga besnikët e Berluskonit.
Megjithatë, në incizim, Berluskoni ka thënë se Perëndimi është veçse në luftë me Rusinë, sepse është duke i dhënë “Ukrainës, para dhe armë”.
“Personalisht nuk mund të shpreh mendimin tim për këtë gjë, sepse nëse do ta merrnin vesh mediat, do të bëhej katastrofë, mirëpo unë jam shumë, shumë, shumë i shqetësuar”, ka shtuar ai.
Në mbrëmjen e së martës, Forza Italia ka thënë se pozicioni i Berluskonit ndaj Ukrainës është në linjë me Evropën dhe Shtetet e Bashkuara. REL/
