Kreu i “Foltores”, Sali Berisha edhe këtë të hënë ka vijuar prezantimin e kandidatëve të tij për zgjedhjet vendore të 14 majit. Nga Belshi, ish-lideri i PD, hodhi akuza në drejtim të qeverisë duke e akuzuar për korrupsion.
Berisha deklaroi se politikat e gabuar kanë varfëruar vendin dhe kanë sjellë shpopullim. Ai shtoi se qeveria nuk i mbështet qytetarët, por pasuron oligarkët në kurriz të të varfërve.
Ai akuzoi mazhorancën se ka nuk subvencionon prodhimin vendas dhe aplikon politika në dëm të fermerëve.
“Pse po ikin, pse po braktisin. Po e braktisin se kjo qeveri që ne duhet ta ndryshojmë sa më shpejt po zbaton politika armiqësore ndaj shqiptarëve. Ju jeni fermerë, por unë po ju jap vetëm një shembull. Nuk ka vend në botë që të vendosë TVSH-në 20% për shitjen dhe zero për blerjen e produkteve. A e dini se çdo të thotë kjo? Do të thotë se çdo prodhues në Shqipëri të preferojë prodhimet e importit dhe jo tuajat.
A e dini se çdo të thotë kjo? Ky është sistem fiskal armiqësor ndaj jush, armiqësor dhe është në kundërshtimin e ligjit. Sepse ligji thotë 20% në blerje dhe 20% në shitje. Ligji nuk është kurrë në atë frymë. Dhe këta çfarë bëjnë, nuk shohin asgjë, përveç interesave dhe pasurimit të tyre dhe një grupi oligarkësh”, tha ai.
Kreu i “Foltores” kërkoi mbështetjen e qytetarëve të Belshit për kandidatin e tij, Bedri Qypin. Berisha ka prezantuar disa nga kandidatët e dala nga Primaret në të gjithë vendin edhe pse ende nuk dihet se nën cilën logo do të kandidojnë më 14 maj.
