Lideri i opozitës Sali Berisha ka vlerësuar zhvillimin e samitit të procesit të Berlinit në Tiranë, si një prej ngjarjeve më te rëndësishme në dy dekadat e fundit, pas samiti të Selanikut.
Në një deklaratë për mediat, ish-kryeministri Berisha vuri në dukje se e ardhmja e rajonit tonë është në Bashkimin Evropian pavarësisht se nga samiti i Selanikut vetëm Kroacia është anëtarësuar në BE
SALI BERISHA
“Samiti i sotëm në Tiranë dëshmon vullnetin, konsekuencën e BE dhe liderëve të vendeve anëtare për të mbështetur perspektivën evropiane të vendeve të rajonit tonë, për të mbështetur procesin e integrimit të tyre në BE.”
Në emër të Partisë Demokratike, Berisha theksoi se opozita mbështet rrugën e Shqipërisë në BE, duke u bërë apel liderëve të Bashkimit Evropian të shohin përtej fasadës së qeverisë Rama
“Prania sot e liderëve të BE është një garanci më shumë për shqiptarët dhe popullin opozitar se asnjë lloj fasade e Edi Ramës nuk do mund të pengojë ata të shohin muret që Edi Rama ka ngritur dhe që ndajnë Tiranën me Brukselin. Të shohin murin e kleptokracisë dhe korrupsionit, murin e drogës dhe krimit të organizuar, murin e varfërisë dhe mjerimit, murin e monizmit thuaj të plotë dhe luftës antikushtetuese, antiligjore ndaj opozitës.”
Mbajtja e samitit të procesit të Berlinit në Tiranë sipas Berishës është mesazhi më i fortë kundër nismës Ballkani i Hapur
“PD shpreh gjithashtu vlerësimin më të madh për samitin e sotëm sepse sot, këta burra të shquar të BE, varrosin pikërisht në ndërtesën mauzole të diktatorit, projektin e Ballkanit të Hapur, të Edi Ramës.”
Përtej diferencave me qeverinë Rama, Berisha vlerësoi samitin si historik për rajonin dhe Europën
