Presidenti i Rusisë Vladimir Putin do të vizitojë këtë të enjte Beogradin.
Në kuadër të vizitës së Putin në Beograd rreth 70.000 shtetas serbë pritet që t’i urojnë mirseradhjen presidentit rus në kryeqytetin e Serbisë.
Sipas mediave serbe mikëpritja e Putinit është organizuar nga organizatat e sektorit joqeveritar dhe organizatat patriotike. Por krahas këtyre organziatave një mbështetje të madhe për mikëpritjen e shefit të Kremlinit ka dhënë dhe partia në pushtet, SNS.
Mikëpritja masive do të organizohet gjatë momentit kur presidenti Putin do të vizitojë katedralen e Shën Savës.
Ndërkohë festimet nuk kanë munguar edhe në veri të Mitorvicës. Sipas raportimeve të mediave kosovare, në çdo cep të qytetit të Mitrovicës janë vendosur kudo flamuj të Rusisë si dhe fotografi të presidentit Putin.
Por krahas këtyre manifestimeve, në Mitrovicë nuk kanë munguar as pankartat me mbishkrimet në gjuhën ruse si “Ne jemi vëllezër, zoti është me ne”.
KosovaPress raporton se fotografitë, famujt dhe mbishkrimet, janë vendosur të mërkurën gjatë natës nga njerëzit e Millan Radojiçiçit, emri i të cilit është i lidhur me shumë ngjarje në veri, duke përfshirë edhe vrasjen e politikanit serb Oliver Ivanoviç.
Po ashtu vendosja e flamujve po vazhdon në pjesë të ndryshme dhe rrugica të veriut të Mitrovicës.
