Gjykata e Tiranës ka lënë në burg çiftin nga Kameruni, Donald Fonkem dhe Maria Goufan. Në qeli do të jenë edhe dy shqiptarët Fatbardh Danja dhe Xhentil Kupe. Të 4 këta persona akuzohet për mashtrim kompjuterik.
Në dosjen hetimore, prokurorja Elisabeta Imeraj ka arritur të dokumentojë mashtrimin e kryer nga këta persona që arrin deri në 4 milionë euro. Ndonëse nuk e tregonin në pamjen e jashtme, organi I akuzës vërejti se 4 të arrestuarit bënin një jetë luksi në Tiranë.
Xhentil Kupe është i njohur për policinë pasi më heret ai është arrestuar për vjedhje në kishën e Shën Mërisë në Voskopojë.
Roli i dy shqiptarëve ishte hapja e bizneseve fiktive pranë QKB-së si dhe tërheqja e parave në banka. E-maili i mbërritur nga një biznesmen i huaj në bankën e nivelit të dytë ku denonconte se dikush ka tentuar që ti vjedhë paratë nga llogaria e tij ka vënë në lëvizje policinë dhe prokurorinë që arritën të zbulonin këtë super-mashtrim.
Grupi ndërhynte në email në momentin që do bëhej pagesa, duke ndërruar të dhënat e llogarive. Në dërgesat e tërhequra rezultojnë shuma të ndryshme nga 15 mijë deri në 300 mijë euro që Donald Fonken dhe dy shqiptarët i kanë marrë nga bankat e nivelit të dytë.
Ata mashtronin duke thënë se kishin aktivitet të gurëve të çmuar e sendeve të tjera me vlerë. Mësohet se 10 biznesmenë deri më tani kanë bërë kallëzim kundër këtij grupi.
Ndërkohë, 4 shtetas të tjerë janë shpallur në kërkim, mes tyre tre të huaj dhe një shqiptar. Këta të fundit dyshohet se ndodhen jashtë Shqipërisë.