TIRANË- Kryesocialisti Edi Rama mblodhi sot Grupin Parlamentar, ku u prezantuan ndryshimet e propozuara ligjore, përmes së cilave synohet që të mos lejohen më gjykatat të pezullojnë nga detyra ministrat, apo postet e tjera kushtetuese. Ndryshimet ligjore mbajnë firmën e Edi Ramës, kreut të grupit të PS, Taulant Balla dhe të kryetarit të Komisionit të Ligjeve, Ulsi Manja.
Kryeministri Rama deklaroi se nisma e propozuar synon të adresojë atë që e cilësoi si “boshllëk mendor” në interpretimin e Kushtetutës, duke theksuar se fryma dhe orientimet themelore të saj nuk kanë mjaftuar për të shmangur keqinterpretimet. Sipas tij, ndryshimet ligjore po ndërmerren për të përcaktuar qartë në nen kompetencat, në mënyrë që të mos ketë më hapësira interpretimi.
Rama u shpreh se kush e lidh këtë nismë me rastin konkret gabon, pra pezullimin e Belinda Ballukut. Ai theksoi se shumica do ta refuzojë me votë çdo ndërhyrje që, sipas tij, cenon territorin kushtetues të pushtetit ekzekutiv, duke shtuar se drejtësia duhet të jetë e pavarur, por jo arbitrare.
Rama: Kjo nismë adreson boshllëkun mendor të shoqërisë sonë që lidhet me faktin se për shkak se fryma e Kushtetutës dhe orientimet themelore të Kushtetutës nuk mjaftojnë, praktikat e të gjitha vendeve që ne u ngjajme nuk mjaftojnë, duhet bërë neni me të gjitha përcaktimet, në mënyrë që mos ketë më mundësi interpretimesh në boshllëk. Kjo është arsyesja pse ne bëjmë këtë ndryshim. Kush e lidh këtë me rastin konkret bën shumë gabim. Rasti konkret ka rrugën e vet, por nuk ka lidhje me pezullimin. Pezullimi është i papranueshëm. Ne do merremi me pezullimin për ta refuzuar me vullnetin e shumicës në Kuvend ndërhyrjen në territorin kushtetues të pushtetit ekzekutiv.
Askush nuk duhet të mendojë se ka në dorë dhe gurin dhe arrën për ta goditur këtë shumicë qeverisëse. Kush e mendon këtë e ka shumë gabim. Ne duam një drejtësi të pavarur. Sot e kemi aq të pavarur sa që një prokuror në një rreth lëshon 33 masa arresti dhe harron të arrestojë veten e vet. Nuk ka mbetur askush pa u arretsuar. Arbitraritet total. Belinda Balluku ma ka dorëzuar tre herë dorëheqjen, jam unë që e kam refuzuar dorëheqjen. Dorëheqje nën presionin e një fuqie që ka dalë nga territori i vet dhe është futur në territorin e pavarëisë së pushtetit ekzekutiv nuk ka./vizionplus.tv
