Shefi i politikës së Jashtme të Bashkimit Evropian, Josef Borrell ka përsëritur kritikat ndaj Prishtinës zyrtare duke e bërë përgjegjëse për ngecjen e procesit të bisedimeve me Beogradin.
JOSEP BORRELL
SHEF I DIPLOMACISE EVROPIANE
“Dua t’ia bëj të qartë Kosovës se bisedimet janë thelbësore për përparimin në rrugëtimin evropian. Së bashku me Mirolav Lajçak, do të vazhdojmë të përgatisim takimin e radhës të udhëheqësve, por kjo do të ndodhë vetëm nëse të dyja palët merren vesh rreth rezultateve pozitive dhe konkrete. Prandaj do të vazhdojmë angazhimin me palët, e posaçërisht me Kosovën, e cila po dëshmon më shumë jogatishmëri për t’u ulur në tryezë”.
Josep Borrell theksoi se marrëdhëniet mes vendeve fqinje duhet të bazohen në vlerat evropiane, pasi në të kundërt cenojnë qëndrueshmërinë në rajon.
“Nuk ka vend në Evropë për mohuesit e gjenocidit, nuk ka vend për glorifikimin e krimeve dhe kriminelëve të luftës si dhe tolerimin ose përkrahjen publike për ata që mohojnë gjenocidin apo madhërojnë krimet e luftës. Jo vetëm që kërcënojnë qëndrueshmërinë rajonale dhe pajtimin rajonal, por po ashtu nuk janë në pajtim me vlerat dhe aspiratat evropiane”.
Kryediplomati bëri të ditur se javën e ardhshme do të nisë një tjetër raund konsultimesh për takimin e ardhshëm mes liderëve ndërsa i dërguari i bllokut për dialogun, Miroslav Lajçak dhe homologu amerikan, Gabriel Escobar do të takojnë zyrtarët më të lartë në Kosovë dhe Serbi.
