Shqipëria mbylli sot një prej fazave më të rëndësishmë në rrugën për tu bërë anëtare e Bashkimit Europian. Përfaqësuesit e vendeve anëtare të BE miratuan në Bruksel raportin e piketave të ndërmjetme, IBAR.
Të premten ky vendim do të merret nga Këshilli i Ambasadorëve dhe pasditen e 26 majit në Bruksel do të zhvillohet konferenca ndërqeveritare BE-Shqipëri.
Pas këtij momenti Shqipëri do të nisë punën për mbylljen e kapitujve që janë kusht për anëtarësimin në Bashkimin Europian.
Dokumenti që miratuan sot përfaqësuesit e vendeve anëtare të Bashkimit Evropian në Bruksel, Pozicioni I Përbashkët I Ndërmjetëm, përfshin kriteret që Shqipëria duhet të plotësoje për të mbyllur negociatat për grup kapitullin më të rëndësishëm të procesit që njihet me emrin themeloret.
Kriteret kryesore kanë të bëjnë me sistemin e drejtësisë dhe luftën kundër korrupsionit, dhe vendet anëtare të BE paralajmërojnë qeverinë dhe parlamentin të mos ndërhyjnë në punën e sistemit të drejtësisë.
“BE shpreh keqardhje dhe i kërkon Shqipërisë të adresojë në mënyrë efektive përpjekjet në rritje dhe shqetësuese të zyrtarëve publikë apo politikanëve, përfshirë edhe ata në nivele të larta, për të ushtruar ndikim të padrejtë mbi institucionet e drejtësisë, përfshirë Strukturën e Posaçme Kundër Korrupsionit dhe Krimit të Organizuar (SPAK), si dhe sulmet personale ndaj gjyqtarëve dhe prokurorëve. BE-ja nënvizon fuqimisht nevojën që pushteti ekzekutiv dhe ai legjislativ në Shqipëri të respektojnë plotësisht pavarësinë e gjyqësorit dhe të zbatojnë plotësisht, si çështje prioritare, vendimet detyruese të Gjykatës Kushtetuese”, thuhet në raport
Brukseli paralajmëron se sa herë që spaku të kërkojë imunitetin e një deputeti apo ministri, duhet të respektohen standartet e vendosura nga Komisioni i Venecias.
“BE shpreh keqardhje për disa vendime të mëparshme të Kuvendit të Shqipërisë, si dhe për komentet e zyrtarëve publikë në lidhje me hetimet ndaj ish-zyrtarëve publikë dhe anëtarëve të Parlamentit. BE thekson rëndësinë që Shqipëria të intensifikojë përpjekjet për të luftuar korrupsionin në nivelet e larta dhe të respektojë parimin e barazisë para ligjit, si dhe që gjyqësori, përfshirë SPAK-un, të vazhdojë të kryejë punën e tij në mënyrë të pavarur, me paanshmëri, përgjegjshmëri, profesionalizëm dhe respekt për të drejtat e mbrojtjes, pa ndërhyrje.”
Një tjetër kusht i rëndësishëm në rrugën e anëtarësimit në BE ka të bëjë me zgjedhjet
“BE thekson se Shqipëria duhet të sigurojë një fushë loje të barabartë për të gjithë kandidatët duke marrë masa për të parandaluar keqpërdorimin e burimeve shtetërore, si dhe duke reduktuar ndikimin e rrjeteve të patronazhistëve.”
Miratimi i raportit të piketave të ndërmjetme është i rëndësishem pasi vetëm tani Shqipëria mund të nisë mbylljen e kapitujve për anëtarësimin në BE.
