Brukseli njoftoi këtë të hënë se ka nisur një hetim ndaj platformës së media sociale TikTok, për të cilën pretendohen se ka dështuar në mbrojtjen e të miturve.
Komisioni Evropian shpjegoi se kishte filluar një procedurë zyrtare për të vendosur nëse TikTok, në pronësi të konglomeratit kinez ByteDance, kishte shkelur Aktin e Shërbimeve Digjitale.
Shqetësimet e “kujdestarit” evropian të botës digjitale lidhen veçanërisht me mbrojtjen e të miturve, transparencën e reklamave, qasjen në të dhëna për studiuesit, si dhe risqet që lidhen me faktin se platforma është krijuar në një mënyrë që të krijojë varësi dhe me përmbajtje të dëmshme.
“Si një platformë që arrin tek miliona fëmijë dhe të rinj, TikTok ka një rol të veçantë për të luajtur në mbrojtjen e të miturve në internet”, tha Komisioneri Evropian i Tregut të Brendshëm, Thierry Breton.
Kjo “procedurë e shkeljes” pritet të lejojë Komisionin Evropian të sigurojë që TikTok të ndërmarrë hapat e nevojshëm për të mbrojtur mirëqenien fizike dhe emocionale të të rinjve evropianë, shpjegoi ai.
TikTok, nga ana e tij, tha se do të vazhdojë të punojë me ekspertë dhe industri për t’i mbajtur të rinjtë në platformën e tij të sigurt dhe se mezi pret t’ia detajojë këtë punë Komisionit Evropian./vizionplus.tv/
