Bashkia e Korcës ka reaguar pas akuzave të degës së Partisë Demokratike në këtë qytet se pushteti lokal por edhe qeveria “Rama” ka mashtruar banorët e Floqit për ndërtimin e banesave të prishura nga tërmeti.
Përfaqësuesja e bashkisë së Korcës doli në një deklaratë për mediat duke pohuar se këtë të martë nis puna për ringritjen e shtëpive të dëmtuara nga tërmeti!
Puna, sipas zyrtares së bashkisë, do të bëhet jo vetëm në Floq por edhe në fshatrat e tjerë Qafzeze dhe Vidohove ku ka pasur shtëpi të dëmtuara.
Pas një pune intensive të grupit të punës të ngritur që ditën e parë pranë bashkisë, në kohë rekord, është llogaritur dëmi i çdo banese të prekur nga tërmeti, janë hartuar preventivat e projektet dhe sot në Floq fillojnë punimet.Bashkia e Korçës me mbështetjen e qeverisë shqiptare dhe bashkive të tjera e donatorëve të shumtë, ka mundur jo vetëm të përballojë me sukses situatën e vështirë të krijuar pas tërmetit, por ia ka dalë të realizojë zgjidhjen përfundimtare të ringritjes të shtëpive të dëmtuara.Punimet e filluara sot jo vetëm në Floq, por edhe në Qafzez dhe Vidohovë do të përfundojnë brenda afatit të premtuar dhe vjeshta do t’i gjejë këta banorë në shtëpitë e tyre të reja.Secili nga aktorët ka bërë detyrën e tij me përgjegjësi të lartë njerëzore dhe institucionale. Bashkia me llogaritjen e dëmit, hartimin e projekteve dhe ndjekjen e punimeve, Qeveria me sigurimin dhe çeljen e fondeve, donatorët me mbështetjen e pakushtëzuar gjatë këtyre javëve dhe në vijim.
Bashkia e Korçës nuk nguroi ti ktheje përgjigje direkte degës së PD në Korçë, duke thënë se kjo forcë politike nuk ka bërë asgjë tjetër vecse e ka shkelur kampin ku janë zhvendosur banorët e prekur nga tërmeti për fotoalbume dhe deklarata qesharake e të pavërteta .
Ndërkohë që brenda 6 javësh Bashkia Korçë ka arritur zgjidhjen përfundimtare të dëmit të shkaktuar nga tërmetet, dega e PD-së në Korçë në këto 6 javë vijon të bëjë veç deklarata.Jeni të painformuar e të vonuar edhe kësaj here!Që nga dita e parë dhe në vijim,të gjithë këtyre banorëve ju është mundësuar veç strehimit, ushqim, veshmbathje, ngrohje, tualeta, dushe, shërbim mjekësor dhe asistencë psiko-emocionale, duke e bërë më të lehtë përballimin e kësaj situate. Sot fëmijët e Floqit janë pjesë e kampit veror të ofruar nga Bashkia Korçë.Po e përsërisim se banorët e Floqit e dinë mirë se cilët ishin vizitorët shëtitës që zgjodhën të bënin biznes politik me fatkeqësinë e tyre, e cilët ishin njerëzit dhe institucionet që ditë e natë kanë qenë pranë tyre për t’u lehtësuar e zgjidhur hallin.Në përmbushje të misionit dhe detyrës sonë ne i dhamë zgjidhje këtij problemi të shkaktuar nga fatkeqësia natyrore dhe këtë nuk e bëmë nga foltorja e as për deklaratën e radhës.
