Bashkëthemeluesi i kartelit Sinaloa, Ismael “El Mayo” Zambada, i cili u arrestua në Teksas në korrik të vitit të kaluar, ka kërkuar të riatdhesohet në Meksikë për të shmangur dënimin me vdekje në Shtetet e Bashkuara.
Ismael “El Mayo” Zambada
Lajmi mësohet se është dhënë nga presidentja meksikane, Claudia Sheinbaum, e cila po ashtu bëri më dije se konsullata meksikanë në SHBA, ka marrë në shqyrtim çështjen.
“Kërkesa nga avokatët e Zambada u pranua në konsullatën në Nju Jork dhe ne po ia dorëzojmë Zyrës së Prokurorit të Përgjithshëm të Meksikës,” tha presidentja meksikane.
Sipas raportimeve, avokatët e Zambada kërkuan riatdhesimin e menjëhershëm të tij si pjesë e një kërkese për mbrojtje konsullore, duke pretenduar se transferimi i tij në SHBA ishte ilegal.
“Nëse qeveria meksikane nuk vepron, do të dënohem me vdekje pa asnjë dyshim”, thuhet në tekstin e publikuar nga mediat e huaja.
Claudia Sheinbaum këmbënguli se ka kërkuar mbrojtjen e baronit të kartelit Sinaloa dhe çështja e tij tani është në Prokurorinë e Përgjithshme, sepse sipas saj, “ka të bëjë me të drejtën e një qytetari meksikan që po gjykohet në Shtetet e Bashkuara, pa ndjekur ndonjë proces të rregullt”.
Kjo kërkesë e “El Mayo”, vjen pak ditë pasi SHBA shtoi në listën e tij të organizatave terroriste kartelin “Sinaloa” dhe Zambada është në gjyq për trafik droge në Nju Jork.
Ismael Zambada, 77 vjeç, është një nga bashkëthemeluesit e kartelit Sinaloa së bashku me Joaquin “El Chapo” Guzmán, i cili po vuan një dënim të përjetshëm në Shtetet e Bashkuara.
Ai pretendon se është rrëmbyer nga djali i “El Chapo” dhe është transportuar kundër dëshirës së tij me një avion privat në Shtetet e Bashkuara të Amerikës.
Guzmán López u arrestua gjithashtu nga autoritetet amerikane pas mbërritjes në Teksas.
