Anëtarja e kryesisë së LSI, Silva Caka ka përjashtuar mundësinë e një bashkëpunimi me Lulzim Bashën për zgjedhjet e pjesshme të 6 marsit.
Në një lidhje me Skype në studion e lajmeve të Vizion Plus, Caka tha se Lulzim Basha është në krah të Edi Raës dhe nuk ka sesi LSI të bashkëpunojë me të. Ajo theksoi se për LSI është e rëndësishme që të vihen përkrah kandidatura të cilat do të jenë opozitare dhe reale.
“E rëndësishme për ne është që të vihen përkrah kandidatura të cilat do të jenë opozitare dhe reale dhe jo e financuar nga kjo qeverisje.
Bashkëpunim me Bashën apo Berishën, unë nuk gjykoj që mund të jenë vetëm këto dy zgjidhje, mund të ekzistojnë edhe zgjidhje të tjera që LSI mund të paraqitet me kandidaturat e saj. Lulzim Basha është në krah të Edi Ramës dhe nuk ka sesi. Me të gjitha ato qe ne pamë gjatë fushatës së 25 prillit, por edhe çfarë ndodhi si brenda PD ashtu edhe jashtë saj në raport me aleatët e përjashtoj mundësinë për të pasur një bashkëpunim me Lulzim Bashën.
Ne ju kemi bërë thirrje të gjithë qytetarëve që mbështesin LSI, të zgjedhin kandidaturën që ju duket më e përshtatshme.Është e rëndësishme të kemi figura që nuk i shërbejnë të njëjtit pushtet. E rëndësishmë që ne te kemi kandidatura që janë realisht opozitare”, tha Caka.
