Lideri i opozitës Lulzim Basha ka nderuar 108 vjetorin e pavarësisë dhe festën e çlirimit, duke zhvilluar homazhe pranë përmendores së Ismail Qemalit në Tiranë e në varrezat dëshmoret e kombit.
Në këtë ditë të rëndësishme për shqiptarët, Basha ka zgjedhur të japë një mesazh shprese në betejën kundër pandemisë së koronavirusit.
LULZIM BASHA
KRYETAR I PD
“Shqipëria dhe shqiptarët po përballen me sfidën e tejkalimit të pandemisë, e cila na ka marrë qindra bashkëqytetarë duke lënduar shumë familje, ndërkohë që mijëra të tjerë po vuajnë pasojat shëndetësore dhe shumë më shumë pasojat ekonomike dhe sociale të pandemisë. Në këto kushte, kjo ditë dhe kjo festë është një kujtesë e fuqisë dhe forcës së kombit tonë. Unë jam i bindur në fuqinë dhe forcën e qytetarëve shqiptarë, në fuqinë dhe forcën tuaj për të qenë së bashku dhe për të tejkaluar së bashku pasojat e kësaj krize dhe pandemie dhe për të dalë më të fortë, më të bashkuar e më të vendosur. Jam i bindur se 28 nëntori tjetër do të na gjejë me një Shqipëri më të shëndetshme, më të mirë dhe më afër Europës.”
Pavarësisht se në kalendarin e festave zyrtare, 28 nëntori është dita e pavarësisë dhe 29 nëntori shënon momentin e çlirimit të Shqipërisë, e djathta njeh vetëm datën 28 për të dy festat.
