Në vazhdën e debateve për ligjshmërine e 30 qershorit dhe qëndrimin e ambasadës së SHBA se këtë ligjshmëri e përcakton vetëm Gjykata e Kushtetuese, ka reaguar edhe Lulzim Basha.
Ai thotë se ky qendrim bie ndesh me parimet e shtetit të së drejtës dhe parimet bazë të demokracisë. Sipas liderit demokrat, 30 qershori, përvecse antikushtetues, ishte një veprim me kosto politike që dëmton interesat e qytetarëve.
Qëndrimi le ta uzurpojë pushtetin vendor Edi Rama në mënyrë antikushtetuese dhe të paligjshme, se pas ca muajsh do krijojmë Gjykatën Kushtetuese dhe pastaj gjykon ajo me prapaveprim, bie ndesh me parimet e shtetit të së drejtës dhe me parimet bazë të demokracisë. 30 qershori ishte jo vetëm veprim anitkushtetues dhe antidemokratik, por edhe një veprim me kosto politike e shoqërore që dëmton direkt interesat e qytetarëve.
Basha shton se 30 qershori u manipulua me cdo mënyrë, që nga aspekti ligjor e deri tek presionet ndaj votuesve dhe mbushja e kutive.
Votimet e 30 qershorit, përtej një farse antiligjore, u manipuluan me cdo mjet dhe mënyrë, që nga manipulimet ligjore dhe kërcënimet e votuesve tek manipulimi i votimit dhe numërimit.
Lideri i opozitës ka edhe një mesazh të nënkuptuar për të gjitha selitë diplomatike në Tiranë të cilat i quajtën zgjedhjet e 30 qershorit të rregullta e që bëjnë apel të vazhdueshëm për dialog mes palëve. Basha shton se nuk mund të ketë tavolina politike pa ndëshkuar ata politikanë që kanë vjedhur zgjedhjet.
Çdokush që pranon në heshtje apo pajtohet me vetëdije me këtë shkatërrim të Kushtetutës dhe të institucionit themelor të demokracisë, zgjedhjeve të lira, nuk i shërben as demokracisë dhe as interesit të shqiptarëve. Opozita nuk i njeh votimet e 30 qershorit dhe nuk ka për t’i njohur. Këtë gjë e vendosën vetë shqiptarët më 30 qershor, në shumicë dërrmuese. Kriza politike në Shqipëri nuk mund të zgjidhet me pandëshkueshmëri, duke i bërë lëshime apo duke falur krimet, vjedhjet dhe shkeljet e ligjit. E vetmja rrugë drejt politikës normale dhe demokratike është ajo e sundimit të ligjit, që do të thotë, mbi të gjitha, një gjë: ndëshkim të politikanëve që kanë vjedhur zgjedhjet dhe kanë bashkëpunuar me krimin.Ndëshkimi i politikanëve që kanë vjedhur zgjedhjet në bashkëpunim me krimin dhe sundimi i ligjit nuk mund të diskutohen apo negociohen në tavolina politike. 30 Qershori është nul, sepse cënon sundimin e ligjit dhe nuk mund të prodhojë asnjë përfaqësim politik.
