Kreu demokrat, Lulzim Basha deklaroi se nuk do të lejojë që në rrugën Tiranë-Durrës të vendoset taksë.
Nga Londra ku zhvilloi një takim me komunitetin shqiptar, Basha tha gjithashtu se në momentin që PD do të vijë në pushtet do të anulojë edhe taksën e vendosur në Rrugën e Kombit.
Sipas Bashës, këto taksa janë të gabuara pasi varfërojnë akoma më shumë shqiptarët.
“Mua m’u ngarkua detyrë ndërtimi i rrugës dhe më dhemb në zemër të shoh që diçka qe u bë me lekët e shqiptarëve tani u kërkojnë shqiptarëve të paguajnë 2-3 fish. Paguajnë edhe taksën e rrugës, edhe taksën e qarkullimit. Asnjëra prej tyre nuk do të ekzistojë kur PD të jetë në pushtet. Pse nuk do të ekzistojnë? Sepse të dyja varfërojnë shqiptarët. Duke i hequr këto të dyja, ne mundësojmë që të ketë më shumë qarkullim. Kjo është ndarja me thikë midis atyre që e kanë mendjen vetëm tek taksat, vetëm tek shtrëngimi, që është Shqipëria e frikës dhe Shqipërisë së lirisë. Shqipëria dhe shqiptarët do të pasuruhen shumë më shumë me taksa të ulëta, sepse do të kenë më shumë motiv për të punuar dhe vetëm puna dhe inicistiva e lirë e pasuron një komb.”
