Kryetari i komanduar i Partisë Demokratike, Enkelejd Alibeaj, ka mbërritur i pari në selinë e Partisë Demokratike.
Ai ka qëndruar përreth dy orë në seli, por nuk është vendosur në zyrën e kryetarit të PD. Mesazhi i parë që Alibeaj ka vendosur të përcjellë është mesazhi i bashkimit të demokratëve.
ENKELEJD ALIBEAJ
KRYETAR I KOMANDUAR, PD
“Dita e sotme besoj kujton për këdo, të gjithë ata të cilët 30 vite më parë votuan të bashkuar, duke zgjedhur lirinë, duke zgjedhur demokracinë dhe unë besoj që bashkimi tek vlerat është çelësi i të gjithë atyre të cilëve vuajnë sot si dikur në fakt, si para 30 viteve, pikërisht peshën e madhe të diktaturës, s’ka zgjidhje tjetër.”
Rreth mesditës në seli ka mbërritur edhe ish-kryetari i PD Lulzim Basha. Basha është përballur me anëtarët e grupimit “Dhjetor ‘90”, të cilët janë rreshtuar në krah të Sali Berishës dhe e kanë uruar për dorëheqjen.
Bislim Ahmetaj: “Urime për dorëheqjen.
Lulzim Basha – Gëzuar “Sulltan novruzin”
Basha ka shmangur çdo koment nëse do të kandidojë apo jo për postin e kryetarit të Partisë Demokratike dhe ka hyrë si çdo ditë në zyrën e tij.
Ai ka takuar për pak minuta kryetarin e komanduar, Enkelejd Alibeaj dhe sekretarin e përgjithshëm, Gazment Bardhi.
Pak detaje dihen për aksionin politik që Basha do të ndërmarrë pas dorëheqjes. Por një gjë është e qartë, Basha nuk do të tërhiqet nga beteja politike dhe brenda pak ditëve ai do të nisë një tur takimesh për të sqaruar demokratët në lidhje me aktin e dorëheqjes.
Gjatë ditës së sotme, i vetmi reagim i Bashës ka qenë një mesazh në rrjetet sociale për të kujtuar 22 marsin e vitit 1992, që shënon fitoren e parë të Partisë Demokratike.
Sipas ish-kreut të PD, sot demokratët ndodhen para betejës për të ndërtuar një PD të së ardhmes në krah të njerëzve dhe të aleatëve strategjikë, e gatshme për të fituar zgjedhjet.
