Në ditën e dytë të takimeve në Kosovë, kreu i Partisë Demokratike, Lulzim Basha ka zhvilluar homazhe në varrin e ish-presidentit të Kosovës, Ibrahim Rugova.

Në një postim në “Facebook”, kreu demokrat e quan Rugovën nismëtarin e lëvizjes madhore për liri, nën dhunën dhe terrorin serb.

“Një moment i veçantë për mua, sa herë që shkoj në Kosovë, është nderimi i arkitektit të Kosovës së pavarur Presidentit Ibrahim Rugova. Dr. Ibrahim Rugova u bë nismëtar i një lëvizje madhore për liri, kur të paktë ishin ata që guxonin ta arrikulonin këtë ide, nën dhunën dhe terrorin serb. Ideja e tij e parashtruar para miqve e partnerëve ndërkombëtarë se Pavarësia e Kosovës do ta paqtonte gjithë rajonin, është sot një realitet.”

Basha shkruan se vizioni, përkushtimi dhe vepra e tij për paqe, e kanë lartësuar përgjithnjë Presidentin Rugova në “altarin e shenjtë të historisë së Kosovës dhe mbarë kombit shqiptar”.

“Ibrahim Rugova do të mbetet frymëzim për breza të tërë politikanësh që vendin dhe popullin e tyre e vënë përpara interesit personal. Nderim përjetë veprës së ndritur të Presidentit Ibrahim Rugova.”

Leave a Reply

Your email address will not be published.