Kushtet e reja të krijuara nga virusi Covid-19 kanë sjellë përgjysmim të punës për baret e restorantet në Korçë.
Për pronarët e këtyre bizneseve situata është bërë më e vështirë pasi me rregullat e reja ata kanë qenë të detyruar të reduktojnë tavolinat me qëllim respektimin e distances mes klientëve.
E vetmja zgjidhje sipas pronarëve të bareve e restoranteve mbetet ajo e shtimit të tavolinave në sipërfaqet publike por pa cënuar lëvizjen e qytetarëve.
Kërkesë kjo që është marrë parasysh edhe nga kryebashkiaku Sotiraq Filo, i cili thotë se në kushtet e pandemisë po shqyrtohen dhe alternativa të tjera për t’i ardhur në ndihmë këtij sektori.
Nga masat lehtësuese pritet që në qytetin e Korçës të përfitojnë rreth 200 biznese që ushtrojnë aktivitetin e tyre në zonën e pazarit të vjetër dhe atë të pedonales.
