Partia Demokratike ka akuzuar nënkryetarin e KQZ, Denar Biba dhe tre anëtarët e tjerë se kanë manipuluar numrin e votuesve më 30 qershor.
Në një dalje për mediat, Sekretari i Përgjithshëm I PD, Gazment Bardhi njoftoi se Partia Demokratike disponon të dhëna të plota sesi ka funksionuar skema e manipulimit të numrit të pjesëmarrësve dhe se do të bëj kallëzim penal në prokurori.
Pjesë e kallëzimit sipas Bardhit nuk do të jenë vetëm anëtarët e KQZ por edhe të gjithë komisionerët që u bënë pjesë e këtij manipulimi.
“Partia Demokratike disponon të dhëna të plota sesi ka funksionuar skema e manipulimit të numrit të pjesëmarrësve në votimet e paligjshme dhe antikushtetuese të 30 qershorit. Ajo ka funksionuar si një piramidë manipulimi, që nis me zyrën e Edi Ramës, vazhdon në zyrën e Denar Bibës, shtrihet tek drejtuesit e KZAZ-ve dhe përfundon tek komisionerët e qendrave të votimit në zonat ku nevojitej fallsifikimi.”
Më tej Bardhi, zbardhi edhe mënyrën sesi KQZ manipuloi numrin e votuesve
“Në Komisionin Qendror të Vjedhjeve Denar Biba, në bashkëpunim me 3 punonjës të administratës, kanë drejtuar operacionin e rëndë kriminal të fallsifikimit dhe manipulimit të votimeve. Pasi merrte urdhrat nga shtabi politik i Edi Ramës për të deklaruar pjesëmarrje të rremë në favor të interesit politik të Partisë Socialiste, Denar Biba dhe tre bashkëpunëtorët e tij në krim, kërkonin nga kryetarët e KZAZ-ve rezultatin që duhej. Ata e siguron këtë nëpërmjet komisionerëve të qendrave të votimit, ku janë mbushur rreth 280 mijë fletë votimi për të plotësuar kuotat e përcaktuara nga Edi Rama dhe shtabi i tij i manipulimit te votimeve antikushtuese.”
Ai akuzoi KQZ se përmes këtij veprimi zhduku transparencën tradicionale të këtij institucioni.
“Nuk hodhi të dhënat e pjesëmarrjes në sistemin online të të dhënave për të mos lënë gjurmë. Nuk publikoi asnjë tabelë me rezultatet e votimit për cdo qëndër votimi. Kamikazët e Edi Ramës në Komision Qendror të Vjedhjeve dhe kudo tjetër do të mbajnë përgjegjësi penale!”
