PSG dhe Liverpool janë dy skuadrat e tjera që kanë prerë një biletë për në çerekfinalen e Uefa Champions League. Barcelona nuk ia ka dalë dot të vazhdojë ëndrrën e saj për të përmbysur gjithçka, njësoj si katër vite më pare, pasi edhe sot skuadra e Kuman nuk shkoi më shumë se një barazim 1-1 përballë skuadrës së Pocetinos.
Ndonëse statistikat folën të gjitha për spanjollët, në fund ata që gëzuan suksesin ishte parizienët. Sfida u zhbllokua shpejt kur Mbape realizoi nga pika e bardhë e 11 metërshit. Nga ana tjetër, edhe kundërpërgjigjja e miqve erdhi shpejt me Messin që shënoi një perlë nga jashtë zone për të vendosur sërish barazpeshën.
Minuta të mira për katalanasit që provuan deri ne fund për të kthyer rezultatin. Rasti më i mirë ishte sërish me yllin argjentinas Leo Messi. Një faull në zonë ndaj Grizman bëri që gjyqtari të drejtonte gishin nga pika e bardhë e 11 metërshit, megjithatë heroi i sfidës do të ishte Kejlor Navas që pret gjuajtjen e Messit dhe mbylli pjesën e parë me shifrat 1-1.
Edhe në të dytën, spanjollët u treguan më të rrezikshëm përpara portës me raste të pastra, por finalizimi mungoi duke mbyllur këtu rrugëtimin e tyre në Uefa Champions League, ndërsa gëzojnë kampionët e Francës që arritën të mbroheshin mjaft mirë duke prerë një biletë në turin tjetër.
Edhe në duelin tjetër, Liverpol- Laipzig nuk kishte surpriza. Anglezët mundën me shifrat 2-0 gjermanët në një ndeshje pa shumë histori. Edhe pse skuadra e Klop vinte pas 5 humbje radhazi në kampionat, në Champions League u tregua një tjetër fytyrë. Të kuqtë vinin me një fitore 2-0 në transfertë, ndërsa edhe mbrëmjen e kësaj të mërkure rezultati ishte i njëjtë. Dy gola të shpejtë në pjesën e dytë bënë që kualifikimi në turin tjetër të mos diskutohej gjatë. Si fillim Salah e më pas Mane vulosën suksesin përfundimtar të sfidës duke mbyllur gjithçka me shifrat 2-0.
Të dy ndeshjet u transmetuan ekskluzivisht në ekranin e Tring.
