Kreu i grupit parlamentar të PS, Taulant Balla, ka pritur në Kuvend Ambasadorin e Bashkimit Europian në Shqipëri, Silvio Gonzato, në nisje të sesionit të dytë parlamentar.
Me anë të një postimi në rrjetet sociale, Balla bën me dije se gjatë takimit, u diskutua mbi avancimin e procesit të integrimit europian dhe rolin kyç të Kuvendit në këtë fazë vendimtare të anëtarësimit të Shqipërisë në Bashkimin Europian.
Balla theksoi se Shqipëria ka hapur të gjitha grupkapitujt e negociatave dhe po ecën me vendosmëri drejt mbylljes së tyre, mbi bazën e meritës, reformave konkrete dhe vlerave europiane, duke shprehur krenarinë për ecurinë e deritanishme të vendit në rrugën drejt Bashkimit Europian.
“Mirëprita në Kuvend Ambasadorin e Bashkimit Europian në Shqipëri Silvio Gonzato, ndërsa Kuvendi filloi sesionin e dytë. Gjatë këtij sesioni synohen të shqyrtohen një numër i madh projektligjesh dhe gjithashtu dy reforma tepër të rëndësishme si Reforma Zgjedhore dhe ajo Territoriale. Diskutuam mbi avancimin e procesit të integrimit europian, rolin kyç të Kuvendit në këtë fazë vendimtare të anëtarësimit të Shqipërisë në BE, me objektin tonë të qartë ngritjen e flamurit tonë kuq e zi në oborrin e Brukselit deri më 28 Nëntor 2030. Krenar për Shqipërinë e cila ka hapur të gjitha grupkapitujt dhe vijon me vendosmëri drejt mbylljes së tyre, mbi bazën e meritës, reformave konkrete dhe vlerave europiane”, shkruan Balla.
/vizionplus.tv
