Bashkia e Elbasanit, sipas udhëzimeve të Ministrisë së Shëndetësisë dhe atë të Arsimit ka nisur dezinfektimin e objekteve arsimore, proces i cili do të jetë periodik.
Numri dy i Partisë Socialiste, Taulant Balla shkruan se rreth 200 shkolla, kopshte dhe çerdhe në këtë bashki po përgatiten për fillimin e vitit të ri shkollor 2020-2021.
Në një postim në “Facebook”, Balla nënvzion se në një periudhë jo të zakonshme të diktuar nga pandemia e Covid 19, godinat duhet të plotësojnë kushte shtesë sidomos përsa i përket higjienës dhe ruajtjes së shëndetit të fëmijëve.
“Po ashtu janë marrë masat për furnizimin e shkollave me dezinfektantë dhe të gjitha pajisjet e nevojshme për higjienën në tualete. Për t’i ardhur në ndihmë Zyrës Arsimore Rajonale, Bashkia e Elbasanit ka vënë në dispozicion edhe mjediset e saj si: Teatri Skampa, Pallatit i Sportit, Qendra Rinore etj në rast se shkollat do të kënë nevojë për ambiente, nisur nga fakti që duhet të ruhet domosdoshmërisht distanca mes nxënësve. Duam t’i garantojmë prindërit se do ta ndjekim në çdo moment situatën në shkolla me parimin kryesor të ruajtjes së shëndetit të fëmijëve dhe stafeve mësimore.”
Nga ana tjetër, Ndërmarrja e Ujësjellës Kanalizimeve është duke kryer një inspektim të hollësishëm të në gjitha shkollat sa i përket furnizimit me ujë të rrjedhshëm.
