Tre avionë luftarakë rusë MiG-31 shkelën hapësirën ajrore estoneze të premten. Avionët qëndruan në hapësirën ajrore estoneze për 12 minuta.
Incidenti ndodh vetëm 10 ditë pasi dronët rusë hynë në hapësirën ajrore polake.
Lexo edhe :
Related Posts
Ministria ruse e Mbrojtjes ka reaguar disa orë pas ngjarjes. Sipas ministrisë thuhet se MiG-31 rusë kryen një fluturim të planifikuar nga Karelia në rajonin e Kaliningradit dhe hapësira ajrore estoneze nuk u shkel.
“Fluturimi u krye në përputhje të rreptë me rregullat ndërkombëtare mbi përdorimin e hapësirës ajrore, pa shkelur kufijtë e shteteve të tjera, siç konfirmohet nga mjetet objektive të kontrollit. Gjatë fluturimit, avioni rus nuk devijoi nga rruga e rënë dakord dhe nuk shkeli hapësirën ajrore estoneze. Trajektorja e fluturimit të avionit kaloi mbi ujërat neutrale të Detit Baltik, më shumë se tre kilometra nga ishulli Vaindlo”, tha në një deklaratë Ministria ruse e Mbrojtjes.
Ndërkohë ditën e djeshme ka reaguar edhe BE. Presidentja e Komisionit Evropian, Ursula von der Leyen deklaroi se Unioni do t’i përgjigjet me vendosmëri çdo provokimi të Rusisë.
Edhe shefja e Diplomacisë Evropiane, Kaja Kallas ka shprehur mbështetjen për vendet anëtare përballë çdo provokimi rus.
Von der Leyen: “Ne do t’i përgjigjemi provokimeve të Moskës”
“Evropa qëndron në solidaritet me Estoninë përballë shkeljes së fundit të hapësirës sonë ajrore nga Rusia. Ne do t’i përgjigjemi me vendosmëri çdo provokimi, duke investuar njëkohësisht në forcimin e krahut tonë lindor. Ndërsa kërcënimet intensifikohen, do të rritet edhe presioni ynë. U bëj thirrje udhëheqësve të BE-së që të miratojnë me shpejtësi paketën tonë të 19-të të sanksioneve”, shkroi Presidentja e Komisionit të BE-së, Ursula von der Leyen, në X.
Kallas: “Avionët rusë në Estoni janë një provokim i rrezikshëm”
“Shkelja e sotme e hapësirës ajrore estoneze nga avionët ushtarakë rusë përbën një provokim jashtëzakonisht të rrezikshëm. Ky është shkelja e tretë e hapësirës ajrore të BE-së brenda pak ditësh, duke përkeqësuar më tej tensionet në rajon. BE shpreh solidaritetin e saj të plotë me Estoninë. Jam në kontakt të ngushtë me qeverinë estoneze. Ne do të vazhdojmë të mbështesim shtetet tona anëtare. Putini po e vë në provë vendosmërinë e Perëndimit. Ne nuk duhet të tregojmë dobësi”, shkroi Përfaqësuesja e Lartë e BE-së Kaja Kallas.
Po ashtu edhe vendi ynë ka reaguar ditën e djeshme. Ministrja për Evropën dhe Punët e Jashtme, Elisa Spiropali, ka dënuar shkeljen e hapësirës ajrore estoneze nga avionët rusë. Me anë të një postimi në “X”, Spiropali thekson se Shqipëria qëndron në solidaritet të plotë me aleatin tonë, Estoninë.
Spiropali: “Shqipëria qëndron në solidaritet të plotë me Estoninë”
“Thellësisht të shqetësuar nga shkelja e hapësirës ajrore estoneze nga tre avionë luftarakë rusë Mig-31 këtë mëngjes. Ne qëndrojmë në solidaritet të plotë me aleatin tonë, Estoninë. NATO mbetet e bashkuar kundër provokimeve të Rusisë”, shkruan Spiropali.
/vizionplus.tv
