Avdullah Hoti kryeministri i ri i Kosovës, Thaçi i kërkon Kurtit që të lirojë karrigen
Avdullah Hoti është kryeministri i ri i Kosovës. Qeveria e tij mori besimin e 61 deputetëve ndërsa në sallë ishin të pranishëm 86 ligjvënës pasi vetëvendosje e bojkotoi seancën.
Hoti paraqiti prioritetet duke bërë të qartë se do të jetë ai i cili do të drejtojë dialogun Kosovë – Serbi.
Ndërkohë, Kryetari i Partisë Demokratike të Kosovës, Kadri Veseli, theksoi se nuk do të jetë kurrë pjesë e pazareve.
KADRI VESELI
KRYETAR, PDK
Nuk jemi me VV-në. As nuk do të jemi me LDK-në. Nuk ka dhe nuk do të ketë kurrë pazare me mua dhe me PDK-në për pushtet.
Seanca u drejtua nga deputeti Kujtim Shala, pasi Vjosa Osmani refuzoi.
Kabineti i ri i Avdullah Hotit do të ketë 16 ministri dhe 4 zëvendëskryeministra, një nga secila parti e koalicionit. LDK do të drejtojë 7 ministri, partia e Ramush Haradinajt 4, Nisma Social Demokrate 2, nga Minoritetet 3 ku bie në sy emri i kryetarit të listës serbe Goran Rakic, i cili do të ushtrojë detyrën e Zëvendëskryeministrit dhe Ministrit të Pushtetit Lokal.
Pas votimit të qeverisë së re, presidenti Hashim Thaçi i ka kërkuar liderit të Lëvizjes Vetëvendosje të dorëzojë karrigen e uzurpuar.
Konferenca për shtyp e presidentit Thaçi është penguar nga protesta e një grupi qytetarësh, të cilët u mblodhën në afërsi të kuvendit me thirrjet “Hajna”.
