Premtimi i transportit publik falas është një ndër më të komentuarit nga opinioni publik dhe nga analistët në studio politike. Kandidati i koalicionit “Bashkë Fitojmë” për Tiranën, Belind Këlliçi, sqaron në Quo Vadis vendimin e këtij premtimi dhe mënyrën se si do të aplikohet.
“Ka nevojë në Tiranë për të marrë masa drastike për të ulur kostot e jetesës së qytetarëve”, theksoi ai. “Me ekipin tim kemi diskutuar gjatë gjithë kohës se kush mund të jetë një masë që i përgjigjet sa më shumë qytetarëve, kryesisht shtresave që kanë nevojë për ndihmë ekonomike, kanë nevojë për mbështetje ekonomike apo që janë në vështirësi ekonomike, të cilën ne mund të alokojmë një pjesë të buxhetit për t’iu përgjigjur një numri shumë të madh qytetarësh. Na rezulton se transporti publik përdoret mesatarisht në Tiranë nga 200 mijë qytetarë në ditë. Kushton 1.5 milionë euro në muaj, kushton 54 milionë lekë në ditë, do të thotë 18 milionë euro në vit. Nga këto 18 milionë, aktualisht Bashkia e Tiranës subvencionin 1,5 milionë euro, mbeten 16.5 dhe po marr këtu të dhënat e vitit më të mirë, të publikuara vetë nga Bashkia e Tiranës, të dhënat e vitit me numrin më të lartë të qytetarëve që është 2019” tha ai. “I bie që më 16.5 mln euro, me 6.8% të buxhetit të Bashkisë Tiranë që është 240 mln euro, ti t’iu përgjigjesh 200 mijë qytetarëve, që për mua është një opurtunitet i jashtëzakonshëm për t’iu zgjidhur hallet qytetarëve”, shtoi ai.
Nga ana tjetër, kundërshtarët e kanë konsideruar si jo real dhe të parealizueshëm këtë premtim të Këlliçit, duke theksuar se mbulimi i kësaj kostoje është në dëm të qytetarëve.
