Mesfushori kuqezi i cilin shënoi golin e tij të parë me fanellën e Interit dhe të dytin në Seria A mbrëmjen e së hënës ka vendosur edhe një rekord të ri në kampionatin italian.
Asllani ishte një nga më të mirët në fushën e lojës në fitoren e Interit 2-1 përballë Genoas mbrëmjen e se hënës.
Sipas të dhënave të “SOFASCORE”, Asllani ka çuar në destinacion të gjitha pasimet që ka tentuar në ndeshjen e të hënës në darkë, 77 nga 77. Një saktësi e jashtëzakonshme për futbollistin shqiptar, në një nga kampionatet më të vështira në botë ku një gjë e tillë nuk ndodh shpesh me këto shifra.
Rezulton se Asllani ka vendosur rekordin e këtij sezoni në Serinë A, pasi askush nuk ka bërë më shumë pasime me saktësi 100% sa mesfushori shqiptar.
I fundit që kishte arritur një shifër të lartë pasimesh ishe Lobotka i Napolit, i ndalur 60/60 në një ndeshje në janarin e këtij viti. Asllani me 77, ka vendosur tashmë rekordin e ri të saktësisë në këtë edicion që vështirë se mund të thyhet.
