Fundjava që lamë pas megjithese e thatë, pa gola, ishte pozitive për disa nga lojtarët e rëndësishëm të kombëtares shqiptare.
Kristjan Asllanit në mënyrë të vecante iu desh të bëntë një ndeshje shumë të mirë si titullar në fitoren e Interit 3 me 1 kundër Empolit, për të sheshuar të paktën për momentin kritikat jo të pakta të marra gjatë javeve të fundit, nëse meriton të qëndroje te zikaltrit qoftë edhe si zëvëndësues i Hakan Calhanoglu.
Kundër Empolit falë lojës së mirë në kabinën e regjisë, disa pasime të shkëlqyera për Lautaro Martinez dhe pasimin nga këndi që solli golin e Dumfris, bënë që ai të kishte një nga notat më të larta të ndeshjes.
Në të tilla nivele edhe Ernest Muçi. Ndonëse luajti vetëm 30 minutat e fundit në duelin që Beshiktash nuk e fitoi dot kundër Samsuspor pasi përfundoi 0 me 0, fantazisti kuqezi prodhoi në fushë më shumë sesa kishte bërë e gjitha skuadra e tij në 60 minutat e mëhershme.
Muçi nxorri në pozita shënimi shokët e skuadrës në 2 raste, dha pesë pasime kyçe dhe provoi edhe në 2 momente të shënonte vete.
Më në fund pak dritë në fund të tunelit edhe për Elseid Hysajn.
Mbrojtësi veteran luajti për herë të parë si titullar në kampionatin italian në këtë sezon për Lacion në suksesin 3 me 0 që skuadra e tij arriti në transferte kundër Veronës.
Hysaj meritoi një nga notat më të larta të ekipit kryeqytetas dhe në fund trajneri Baroni nuk kurseu fjalet e mira për futbollistin shqiptar, i cili në pjesën e parë të edicionit ishte i përjashtuar nga klubi lacial./vizionplus.tv
