Një 19-vjeçar me origjinë shqiptare është arrestuar nga policia italiane pas një operacioni antidrogë në Savona. Hetimi, i fokusuar te shpërndarja e lëndëve narkotike mes të rinjve, çoi në zbulimin e një sasie të madhe droge dhe një shume parash që dyshohet se lidhet me aktivitetin kriminal.
I riu u ndalua pranë një qendre tregtare në Savona, ku gjatë verifikimeve deklaroi se përdorte vetëm banesën e familjes. Megjithatë, hetuesit kishin dyshime se ai kishte në dispozicion edhe një apartament tjetër, të cilin dyshohet se e përdorte për të fshehur lëndët narkotike.
Gjatë kontrollit të banesës së dytë, policia gjeti dhe sekuestroi rreth 3 kilogramë e gjysmë drogë, konkretisht 1,030 kilogramë hashash, 2,145 kilogramë marijuanë dhe rreth 280 gramë kokainë. Sipas autoriteteve italiane, vlera e drogës në tregun e shitjes me pakicë do të arrinte mbi 50 mijë euro.
Lënda narkotike ishte fshehur në vende të ndryshme të apartamentit, mes tyre në një dhomë magazinimi, në kuzhinë, brenda enëve, në dollapë dhe në frigorifer.
Përveç drogës, gjatë operacionit u sekuestruan edhe materiale për paketimin e dozave, dy telefona celularë dhe 1.400 euro para cash, shumë e cila, sipas policisë, nuk përputhej me gjendjen ekonomike të të riut, i cili nuk kishte një punë të rregullt.
19-vjeçari u arrestua nën akuzën e mbajtjes së lëndëve narkotike me qëllim shpërndarjen dhe u dërgua në burgun “Marassi” në Genova.
