25 persona u arrestuan në Gjermani pas një operacioni të ndërmarrë nga policia në 11 lande.
Ata u vunë në pranga pasi synonin të realizonin një grusht shteti për rrëzimin e qeverisë. Sipas mediave gjermane, 25 personat e dyshuar janë ekstremistë te djathtë si dhe ish-ushtarakë. Grupi kishte në plan të sulmonte ndërtesën e parlamentit, Rajshtag, e më pas të merrte pushtetin.
Drejtuesi i organizatës ishte një 71-vjeçar, që anëtarët e saj e konsideronin si “Princi Heinrich XIII”, i cili tashmë është kapur nga policia. Autoritet bënë me dije se kjo organizatë kishte në plan që pas përmbysjes së qeverisë, ta kthente Gjermaninë në një regjim monarkik.
Ministri i Drejtësisë, Marco Buschmann, tha se organizata terroriste dyshohet se është krijuar që në nëntor të vitit 2021, ndërsa hetimet nga autoritetet federale për grushtin e shtetit nisën në muajin gusht.
Operacioni u zhvillua në pjesën më ta madhe të Gjermanisë, ndërsa dy persona u arrestuan në Austri dhe Itali. Policia gjithashtu kontrolloi 137 objekte ku dyshohej se ushtronin aktivitetin personat e arrestuar si dhe bashkëpunëtorë të tjerë që janë në kërkim.
