Lëvizja Socialiste për Integrim ka ngritur shqetësimin në lidhje me situatën e ndodhur në Malësinë e Madhe ku një efektiv policie u shfaq në një video teksa kryente veprime të turpshme dhe u akuzua se po ngacmonet një minorene.
Në një deklaratë për mediat, kreu i grupit të LSI, Petrit Vasili u shpreh se rasti I Malësisë së Madhe ka nxjerrë në pah problemin se policia nuk po pranon më denoncimet e qytetarëve.
“Policia në rastin konkret, e përfshirë në këtë çështje është besoj sinjali më i keq dhe negativ që mund t’i jepet qytetarëve shqiptarë, lidhur me këtë problem. Por situata është akoma më e rëndë, sepse denoncimi i bërë për këtë çështje, nxjerr në pah një nga problemet më kritikët dhe më të rëndët, që denoncuesve u është mbyllur dera në fytyrë në stacionet e policisë. Dhe policia nuk pranon denoncimet e qytetarëve, refuzon dhe përkundrazi i përball qytetarët pikërisht me ata të cilët këta i denoncojnë. Përballë një situate të tillë, sigurisht opinioni publik është i shqetësuar sesi dera e Policisë së Shtetit, në vend që të ishte një derë e hapur, është një derë e mbyllur. Në vend që të ishte një derë mbështetjeje, kthehet në një instrument shantazhi. Dhe kur njësh me këtë situatë bëhet edhe vetë ministri, duke u vendosur në një pozicion vërtetë të shëmtuar publik, por edhe një pozicion të neveritshëm politik. Gjithashtu Policia e Shtetit funksionon në kushte të tilla kaq të mjerueshme, sa vetëm një fakt mjafton për të kuptuar të gjithë situatën.”
Vasili akuzoi ministrin e Brendshëm, Sandër Lleshajn se nuk po e merr përsipër ngjarjen dhe se po dekurajon hetimin.
“Ministri merr përsipër e thotë, në nuk kapim dot, nuk njohim denoncuesin. Po çfarë presin këta, kur denoncimi del e është bërë në një portal tjetër? Pse kjo Prokurori, Polici, Ministër i Brendshëm, nuk kërkon që të gjithë ata që drejtojnë në policinë e Malësisë së Madhe, së paku hapi i parë të pezulloheshin, për tu vendosur në kushte të barabarta, për të zbardhur një të vërtetë tronditëse. Këto tregojnë qartazi që në vend të veprimeve konkrete, të shpejta të fortë, që inkurajojnë denoncimin. Në mënyrë që ky fenomen i shëmtuar të dalë në pah dhe të goditet me rreptësinë më të madhe. Përkundrazi dekurajojnë, shkojnë atje me idenë që nuk gjejnë dot denoncuesin. Japin të gjithë pamjen e pamundësisë dhe gjithë opinion publik pyet. Kur denoncimi është bërë i qartë, dihet kush janë njerëzit, policia nuk e gjen dhe nuk e kap dot denoncuesin. Por a është në gjendje kjo polici të luftojë krimin e organizuar që është shumë i sofistikuar, shumë më i pajisur, me instrumente të tjera me mjete të tjera.”
