Tre persona, një prej të cilëve ka qenë i dënuar më parë për vjedhje, kanë përfunduar në prangat e policisë së Durrësit, pasi po lëviznin me armë zjarri dhe jelek antiplumb. Në kuadër të operacionit të koduar “Silenciatori”, u bë e mundur kapja e B. M., 28 vjeç; V. Z., 24 vjeç dhe E. K., 32 vjeç, i dënuar më parë për vjedhje.
Mjeti me të cilin këta persona po qarkullonin është mbajtur nën vëzhgim dhe është ndalur për kontroll. Gjatë kontrollit të ushtruar në mjetin tip “BMW”, me drejtues shtetasin B. M., në sediljen e pasagjerit, në një çantë dore, u gjet një armë zjarri me silenciator dhe në bagazhin e mjetit një jelek antiblumb si i Policisë.
Nga hetimet rezulton se armën e zjarrit dhe antiplumbin do t’i shisnin kundrejt vlerës 3000 euro.
Po ashtu, në banesën e shtetasit V. Z., u gjetën 10 doza me lëndë narkotike të dyshuar kanabis.
Ndërkohë, vijon operacioni për identifikimin dhe kapjen e personave që do të blinin sendet e kundërligjshme.
