“Antarësimi në 2030, prioritet”, Spiropali dhe Hasani: Zgjerimi i BE, i rëndësishëm për Europën

Kryetarja e Kuvendit, Elisa Spiropali, deklaroi se anëtarësimi i Shqipërisë në Bashkimin Evropian brenda 5 viteve mbetet prioritet i qeverisë shqiptare. Gjatë punimeve të Asamblesë Parlamentare të Procesit të Bashkëpunimit të Evropës Juglindore, Spiropali vuri në dukje se brenda këtij muaji do të çelen të gjithë kapitujt e nevojshëm për anëtarësimin, duke theksuar se ambicia e Shqipërisë është mbështetur edhe nga Brukseli.

“Objektivi ynë strategjik kombëtar për të mbyllur negociatat brenda vitit 2027 dhe për t’u anëtarësuar brenda vitit 2030 ka gjetur mbështetjen e Parlamentit dhe Komisionit Europian, si edhe po fiton mbështetje të gjerë nga vendet anëtare. Ndërkohë, ne synojmë të hapim të gjithë kapitujt e negociatave brenda muajit qershor 2025.”

Ndërsa shefi i diplomacisë shqiptare, Igli Hasani, vlerësoi rolin e parlamenteve në procesin e integrimit.

“Ne besojmë fuqishëm se zgjerimi i BE-së mbetet një nga projektet më të suksesshme të paqes në histori për ne, Evropën Juglindore. Ai është më shumë se një objektiv politik, është një domosdoshmëri strategjike.”

Shqipëria mban presidencën e radhës të Procesit të Bashkëpunimit për Evropën Juglindore dhe në sesionin e sotëm në Tiranë morën pjesë delegacione nga Bullgaria, Turqia, Rumania, Sllovenia, Kroacia, Mali i Zi, Bosnjë e Hercegovina, Serbia dhe Maqedonia e Veriut.

/vizionplus.tv