Kryetari i Grupit Parlamentar të Partisë Socialiste, Taulant Balla e ka konfirmuar se qeveria do të kalojë në këtë sesion parlamentar ligjin e shumë kritikuar nga opozita por edhe faktori ndërkombëtar, për Amnistinë Fiskale deri në vlerën 2 milionë euro.
Sipas Ballës ky ligj do jetë garanti i ligjësimit të parave të padeklaruara, që siç ai vetë e pranoi në Shqipëri janë me shumicë.
“Ne do ta sjellim ligjin për Amnistinë Fiskale, jemi të bindur që është një domosdoshmëri në këtë kontekst të ri ekonomik të vendit dhe për të gjithë ata që kanë spekuluar për nismën, që sipas jush i hapka rrugën legalizimit të parave të krimit.
Ne themi se është ligji që propozojmë garanti për ligjësimin e parave të padeklaruara dhe paregjistruara. Ne dimë të gjithë që në Shqipëri ka plot para të padeklaruara. Ligji e ndan qartësisht se cila do jenë subjekte përfituese dhe cila subjekte përjashtohen nga skema e amnistisë.
Nuk ka amnisti të plotë, por vetëm për një pjesë. Unë e ftoj opozitën që të bëhet pjesë e diskutimit kur qeveria ta sjellë, në të mirë të ekonomisë së vendit dhe të një lufte edhe më të ashpër, kundër trafikimit, terrorizmit dhe pastrimit të parave”, tha Balla.
Përsa i përket vendimit të Këshillit Europian për mbajtjen e Konferencës së Parë Ndërqeveritare mes Shqipërisë dhe Komisionit Europian, Balla theksoi se ky është një moment historik, edhe Kuvendi i Shqipërisë nuk do të mbetet pas përsa i përket rolit që ka në këtë proces, mos të harrojmë që Kuvendi i Shqipërisë ka rolin udhëheqës në këtë proces.
“Natyrshëm që është qeveria ajo që negocion por është Kuvendi ai që ka rolin e vet dhe për këtë arsye kemi dakordësuar në Konferencën e Kryetarëve edhe ngritjen e një Komisioni të Posaçëm për ndryshimin e ligjit për rolin e Kuvendit të Shqipërisë përgjatë procesit të integrimit. Do të jetë një komision bipartizanme barazi mes mazhorancës dhe opozitës. Do të jetë një komision me mandat të shkurtër pasi ligji duhet ndryshuar me urgjencë për të përqasur rolin që ka Kuvendi në këtë fazë të re”, deklaroi Balla.
