Deputetja e opozitës parlamentare, Rudina Hajdari ka kërkuar që Këshilli Politik të mblidhet të martën në orën 12:00.
Ajo u shpreh se draft i Partisë Demokratike për ndryshimet në Kodin Zgjedhor i shkon përkrah atij të opozitës parlamentare, dhe që synon hapjen reale të listave 100% .
Hajdari propozon që të takohen nesër për të diskutuar dhe dakordësuar rreth kësaj çështjeje.
“Të nderuar anëtarë të Këshillit Politik, Me kënaqësi konstatova se Partia Demokratike ka dorëzuar pranë Këshillit Politik një draft propozim për amendamentet e Kodit Zgjedhor, propozim ky i cili shkon përkrah atij të opozitës parlamentare e që synon hapjen reale të listave 100% duke ia mundësuar qytetarit e jo më kryetarit përzgjedhjen e deputetëve në Parlamentin e ardhshëm. Duke qenë se tashmë të gjitha palët i kanë depozituar propozimet e tyre lidhur me këtë çështje, propozoj të takohemi nesër në orën 12:00 për të diskutuar dhe mundësisht dakordësuar rreth kësaj çështjeje. Sytë e shqiptarëve janë nga përfaqësuesit e tyre politikë dhe ata sot kërkojnë një reformë zgjedhore e cila pikë së pari të rikthejë sovranitetin te populli nëpërmjet mekanizmit të hapjes së listave. Le të bëhemi bashkë dhe ta përfaqësojmë këtë vullnet qytetar, duke e miratuar me konsensus hapjen reale të listave për zgjedhjet e ardhshme. Duke uruar në një përgjigje pozitive”, shkruan Hajdari.
