Ambasadorët e Shteteve të Bashkuara të Amerikës dhe të Bashkimit Evropian përcollën një mesazh urimi për besimtarët myslimanë që këtë të dielë festojnë Fiter Bajramin.
Ambasada e SHBA tha në postimin në rrjetet sociale se kjo ditë duhet të shërbejë për reflektim.
“Në emër të Ambasadës së Shteteve të Bashkuara, iu shprehim urimet më të mira të gjithë atyre që festojnë Fiter Bajramin. Sot, më shumë se kurrë, kjo ditë ofron një mundësi për të reflektuar mbi angazhimin tonë të përbashkët për ndërtimin e komuniteteve paqësore dhe të begata. Ndërsa bota përballet me sfida të reja, ne shpresojmë dhe urojmë që ky vit të sjellë shëndet të mirë dhe gëzim në familjet e të gjithëve! Gëzuar Bajramin!”
Ndërsa kryediplomati i BE, Luigi Soreca uroi për paqe, shëndet dhe lumturi.
“Gëzuar Fitër Bajramin për të gjithë ata që festojnë sot. Uroj që sakrificat dhe përkushtimi gjatë muajit të shenjtë të Ramazanit në këto kohë të vështira të sjellin më shumë paqe, shëndet dhe lumturi për familjet tuaja dhe gjithë popullin shqiptar!”
