Ambasadoret e huaj që gjenden në Shkup po ndjekin me shqetësim zhvillimet e orëve të fundit në Maqedoni. Ata kanë bërë thirrje për qetësimin e situatës dhe shmangien e akteve të dhunës dhe retorikave nxitëse. Mesazhin e tyre e përcolli diplomati nga Suedia.
“Po ndjekim situatën që po ndodh në Kuvend. Kjo është e papranueshme. Ftojmë pëe përmbajtje nga dhuna, këto janë lajme shqetësuese. I ftojmë të gjitha palët që të përmbahen nga dhuna dhe retorika. Nuk është koha për dhunë por për dialog. I bëjmë thirrje policisë se ka për detyrë që të ruajë rendin”.
Një reagim ka mbërritur edhe nga komisioneri për Zgjerimin në BE, Johannes Hahn. Në një postim në rrjetet sociale ai ka shkruar: Dënoj me forcë sulmet ndaj deputetëve në Shkup. Dhuna nuk ka vend në parlament. Demokracia duhet të vazhdojë rrugën e saj.
Edhe ministria e Jashtme shqiptare përmes një deklarate ka dënuar skenat e dhunës ndaj deputetëve të opozitës dhe u ka bërë thirrje aktoreve politikë të tregojnë vetëpërmbajtje, të mos përdorin retorika që përshkallëzojnë tensionet dhe të angazhohen maksimalisht, me qetësi, e gjakftohtësi në një dialog të qenësishëm.
